醫生轉病人 - 入廠記6
話說我好快就出左院。我之前行步路都龜速，輕輕笑個傷口都痛要按住個肚，起身條腰發唔到力用錯勁嘅肌肉搞到條頸好鬼痛，個傷口滲好多血➡️滲少左血➡️過左成個禮拜Meet Sterile Strip個下都仲係印到有血➡️我冇望佢/我當佢唔存在唔滲血/唔好問我我唔知/我唔想俾人生吉一針/大家當冇事發生/唔使提我過咗幾多日點解傷口仲埋口😅⋯⋯到到而家，除咗個傷口之外，已經有好大進步。我估下個禮拜返去覆多次診就唔使再返醫院。
成件事好似發左場夢咁。我又唔覺得自己有啲好感慨嘅死過翻生/死裏逃生/大難不死必有後福嘅感覺。淨係知我平時唔買六合彩因為一定唔會中，玩擦擦咭一定冇奬攞，買抽奬卷乜都抽唔到。之前去醫院低能被逼交會費嗰啲Doctor's Association Annual Dinner，抽大奬二奬三奬一定無我份，連十奬都無我份。淨係全枱都有嗰啲人人有奬永不落空超市/咖啡禮券我先至有。到到而家呢間診所嘅春茗同聖誕聯歡會，我最多都係抽到低能番梘。
我知我obviously冇橫財命🙄，但係呢啲咁嘅死人冧樓緊急手術就有我份中。我Google完個probability就想爆粗。我知唔會諗到個Silver Lining係咩。我知上高個大佬自有安排，人類咁無知會係唔會明佢嘅心意，可能死咗嗰日你見到佢先會話俾你知點解。又或者可能好似玩Sims咁，玩嗰個悶悶地，撳中我呢個人仔，送左我入廠for the heck of it。我唔係話我欣然接受，但係做得呢行，點樣發生，個Pathology係點，你有得睇書。如果大家做嘅嘢係一模一樣，大家都係健健康康，但係點解係發生喺你身上而唔係係第二個，就真係冇得解釋。喂，我 good past health架，只能講句我黑仔囉。Kübler-Ross model 我都應該就黎Anger完😔⋯⋯
Any肥，經歷咗呢個小波折，我有新嘅諗法。
我決定要食多啲Dryer's Rocky Road同埋KFC。我諗過如果就咁瓜老襯，我一路忍口唔食雪糕咪好笨7？我仲要去築地食晒佢全部嘅魚生！ 仲要食咗我戒口好耐嘅八爪魚同燒魷魚筒！要食食食食食食食食食！！！（其實我入院個日個Lunch係食咗🍔🍟。我記得個朝早好忙，好都病人都要傾好耐好耐，所以我出嚟同姑娘講話要買麥當當唔係人會癲。我有諗過最後午餐食咗薯條都幾開心！🤣🤣）
另外，啲人成日話你放咁耐假會唔會好悶？係絕．對．唔．會！我可以再放多啲。日日冇嘢做，訓到自然醒，一口氣睇咗七季嘅權力遊戲係超級爽！（唔好打頭！）
當然另外必定做嘅就係要計劃去好多好多好多旅行。我想講已經買咗11月中嘅飛同訂埋酒店！其實11月仲想飛多轉哈哈哈！（而我未通知老細哈哈哈！）
老土啲講句，多謝我屋企人嘅悉心照顧！多謝好多老朋友叫我唔好死住🤣🤣！多謝診所嘅同事捱義氣睇好多好多症！多謝咁多位嘅關心同留言！之後會出返正常嘔血嘅Posts。😘
提早送個月亮祝你哋人「肉」兩團圓。生命無常，多啲😘😘你身邊嘅人！🙏🏻🙏🏻🌕✨
Search